Literatura

Paisaxes inspiradoras

As Rías Baixas son musa e escenario literario desde o medievo 

A ría de Vigo inspirou os trobadores medievais galegos e Jules Verne. Emilia Pardo Bazán atopou un remanso de paz para escribir no balneario de Mondariz e nas terras de Deza, do mesmo xeito que María Vinyals achou a atmosfera idónea para deixar voar a súa imaxinación no castelo de Soutomaior, polo que corricou de nena e ao que convidou grandes personaxes da época.

A vida en Vila de Cruces foi a principal fonte da que bebeu Xosé Neira Vilas. Vilanova de Arousa viu nacer e esporeou a creatividade de Ramón María del Valle-Inclán, do mesmo xeito que o talento de Francisco e Julio Camba. Bernardino Graña, o poeta do mar, cantoulles aos pescadores de Cangas e á forza e inmensidade da paisaxe do Morrazo; e un cordón umbilical irrompible une Cambados con Ramón Cabanillas, cuxa escultura observa o horizonte sentado nun banco da vila.

Pontevedra e Vigo foron históricamente, e aínda son hoxe, sementeiro de escritoras e escritores

Castelao pasou os anos centrais da súa vida nunha Pontevedra que vivía entón un dos seus grandes períodos de efervescencia intelectual. Cantares gallegos, obra que marcaría o Rexurdimento da lingua galega, imprimiuse en 1863 en Vigo. As dúas cidades foron historicamente e ata hoxe sementeiro de escritoras e escritores, de berce uns e chegados de diferentes lugares outros, todas e todos imbuídos do seu rico ambiente literario.

O idilio da provincia de Pontevedra co mundo das letras abrangue todos os seus recunchos. A lista de creadoras e creadores nados nas Rías Baixas esténdese desde o medievo ata os nosos días, e personalidades vindas doutras provincias e latitudes viviron aquí episodios fundamentais ou centrais das súas vidas. Álvaro Cunqueiro, María Victoria Moreno, Carlos Casares, Agustín Fernández Paz e unha longa nómina de creadoras e creadores son máis que ilustres pontevedresas e pontevedreses de adopción.

Outras e outros teñen aquí as súas raíces, como a brasileira Nélida Piñón, con orixes en Cotobade. E as estancias breves tamén deixaron a súa pegada en grandes escritoras e escritores universais. En Verne, que deulle a coñecer ao mundo os tesouros de Rande; ou en Julio Cortázar, que se daba baños «como Poseidón» en Nigrán. Unha terra que respira literatura na súa idiosincrasia, na súa cultura e nos seus paisaxes máxicos.

Vigo navega no Nautilus

A lenda dos galeóns afundidos en Rande serviu de inspiración a Jules Verne para a súa novela Vinte mil leguas baixo dos mares. «Pois ben, señor Aronnax, estamos na baía de Vigo e só de vostede depende que poida coñecer os seus segredos». Con esta frase, e a bordo do Nautilus, o capitán Nemo convida en 1868 o seu prisioneiro, o biólogo Pierre Aronnax, a participar na recuperación do ouro mergullado na ría. Más de século e medio despois, o conxunto escultórico de José Molares, xunto á illa de San Simón, lembra a presenza de Vigo na obra do xenial escritor.